Foto: Websteed vun Heinrich Thies
En Pressemellen vun Plattnet:
An’n 10. Juli 2023 is Heinrich Thies in’t Öller vun 85 Johr na en lange un swore Krankheit storven. De Plattdüütschen truert um en Minschen, de för de plattdüütsche Spraak streden hett as knapp en anner een.
Teihn Johr lang hett he dat Leid vun de Fehrs-Gill hatt, hett sik dorför insett, dat se vun en literoorschen Vereen hen to en Sellschop för nedderdüütsche Spraakpleeg, Literatur un Spraakpolitik worrn is. Sünnerlich de Insatz op dat Rebeet vun de Spraakpolitik hett em nu al vele Johren in Gang holen.
1938 is de Holsteener Jung in Westerrönfeld bi Rendsborg to Welt kamen. To Huus un ok mit de annern Kinner in’t Dörp snack he blots plattdüütsch. Denn keem de Jung na de Hoge School un an’t Studeren, güng achteran as Jurist in de Weertschop.
In Glinn, woneem he mit Fru un Dochter hentrocken weer, hett he düchtig mitholpen, dat de Heimat- un Börgervereen Glinn un dat Museum in de Glinner Möhl in Gang kemen. Bannig insett hett he sik, as dat üm dat Anmellen vun Nedderdüütsch as Regionalspraak bi de Europääsche Sprakencharta güng. Dor hett he vele Lüüd as Förspreker winnen kunnt, de ehr Stütten mit ehr Ünnerschrift wiesen deen. En Barg Politikers in all Parteien kunn he vun de Saak begeistern.
Överto hett he mit dorför sorgt, dat dat toeerst in Stormarn, denn in’t ganze Land de Möglichkeit gifft, de olen plattdüütschen Oortsnamen mit op de Schiller an’n Oortsingang schrieven to laten.
As Vörsitter vun de Fehrs-Gill hett sik Hein Thies vele Johren in männich en Gremium engageert, hett Initiativen för Plattdüütsch in de School un in de Medien Stütt geben. He hett den Plattdüütschen Raat för Sleswig-Holsteen mit op den Weg bröcht un is sülvst enige Johren dor Liddmaat ween. Sien Menen harr Gewicht bi de Plattdüütschen in’t Land. Dat Bunnsverdeenstkrüüz kreeg he för sien grote Arbeit för de plattdüütsche Spraak.
Hein Thies un de gele SASS – en Erfolgsgeschicht, för de he steiht. En smalle Book, dat weer in fröher Tieden dat lütte plattdüütsche Wöörbook vun Johannes Saß. De harr ok anfungen, eerste Regeln för dat plattdüütsche Schrieven optostellen. Hein Thies hett domit wiedermaakt un för de Fehrs-Gill den niegen SASS jümmer grötter warrn laten, in de letzte Utgaav finnt wi mehr as 10.000 Stichwöör. Un nich noog dormit: Bi sien johrelange Wöörbookarbeit keem denn ok noch de SASS-Grammatik bi rut, för de dat intwüschen al en drütte Oplaag gifft, liekers dat een dat Wark intwüschen ok in’t Internet opropen kann.
In’n September 2022 kunn de Fehrs-Gill tosamen mit vele Mitstrieders fiern, dat dat SASS-Wöörbook nu ok online to bruken is, mit 180.000 Stichwöör. Dat is en Mielensteen för de Arbeit mit de plattdüütsche Spraak un nu al nich mehr wegtodenken. Dat en plattdüütsche Rechtschrievhölp för dat WORD-Programm fardig warrt, dat hett Heinrich Thies nu nich mehr beleevt.
De Fehrs-Gill un mit ehr vele Plattdüütschen in’t hele Spraakrebeet truert um Heinrich Thies un denkt vull Mitgeföhl an sien Familie.
De Vörstand vun de FehrsGill
Marianne Ehlers, Volker Holm un Günther Wehmeier